Implantologjia Dentare

Implantologjia është metoda më moderne për të zëvendësuar dhëmbët e humbur, duke ju rikthyer një buzëqeshje natyrale dhe të shëndetshme, si dhe besimin në veten tuaj, madje brenda 24 orëve. Implanti dentar përbëhet nga një vidë prej titaniumi, një material plotësisht biokompatibël. Kjo cilësi i lejon atij të integrohet në mënyrë të përsosur me kockën, duke u kthyer në një rrënjë të ngjashme me atë natyrale, mbi të cilën mund të vendoset një kurorë ose një urë në rastet kur mungojnë disa dhëmbë.

Klinika jonë përdor implante dentare të cilësisë së lartë dhe me garanci të besueshme (Megagen, Straumann, Schutz, Ankylos Dentsply). Sipërfaqja e tyre është trajtuar me përbërës të veçantë për të përshpejtuar dhe lehtësuar procesin e osteointegrimit.
Vendosja e implanteve dentare është një proçedurë kirurgjikale e thjeshtë, e shkurtër dhe pa dhimbje, gjatë së cilës pacienti është totalisht i relaksuar si rezultat i sedacionit venoz koshient.

Implantologjia me guidë të kompjuterizuar është metoda më e avancuar në implantologjinë moderne. Pas mbledhjes së të dhënave nga skaneri 3D CBCT, vendosja e implanteve mund të simulohet në kompjuter, duke lejuar planifikimin e saktë të pozicionit dhe këndit të tyre për çdo pacient, me një preçizion maksimal.Kjo metodë ndihmon në parandalimin e problemeve klinike dhe estetike që shpesh shfaqen nga vendosja e gabuar e implanteve dentare. Procesi përfshin transferimin e planifikimit kompjuterik tek pacienti përmes prodhimit të shinave kirurgjikale, të njohura ndryshe si 'guida'.

Avantazhet e kësaj teknike janë:
Invazion minimal
Nuk përdoret bisturi, nuk ka nevojë për hapjen e mukozave dhe qepje. Kjo shmang ënjtjet, dhimbjet dhe hemorragjinë.

Kontroll i saktë i pozicionit të implantit
Ky aspekt është veçanërisht i rëndësishëm kur pozicionimi i implanteve duhet të jetë i saktë, si në teknikat 'All on 4' apo në rastet ku ka mungesë të kockës dhe implantet duhet të vendosen në pozicione specifike për të shmangur strukturat anatomike pranë.

Në fazat e hershme të implantologjisë, pas vendosjes së vidës në kockë, duhej të pritej 3-4 muaj për vendosjen e kurorës, kohë e nevojshme për osteointegrimin e implantit me kockën. Sot, me përparimet në stomatologji, kirurgji dhe teknologji, është e mundur në shumë raste që kurora provizore të vendoset menjëherë mbi implantin e sapovendosur.

Ngarkesa e menjëhershme mund të përdoret për një implant të vetëm kur zëvendësohet një dhëmb, ose për 4, 6, apo 8 implante kur zëvendësohen të gjithë dhëmbët e një nofulle. Proteza me ngarkesë të menjëhershme është një protezë fikse provizore që mbështetet direkt mbi implante dhe jo mbi indet e buta. Protezat që mbështeten mbi indet e buta mund të shkaktojnë shqetësime si lëvizje, plagë, dhe të rrezikojnë procesin e integrimit të implantit për shkak të forcave të papërshtatshme.

Teknika e ngarkesës së menjëhershme mund të aplikohet vetëm te pacientët që kanë kockë të përshtatshme në cilësi dhe sasi, dhe kur stabiliteti i implanteve është mbi 35 N/cm. Kirurgu, pas analizës së kockës përmes skanerit tredimensional, mund të përcaktojë nëse jeni kandidat i përshtatshëm për këtë procedurë.

Me implantet dentare mund të zëvendësohen të gjithë dhëmbët në rastet kur ka mungesë totale të tyre, duke eliminuar shqetësimin për lëvizjen e protezave gjatë ngrenjes apo bisedave me të tjerët.

Për të zëvendësuar një harkadë të plotë me dhëmbë fiks, janë të nevojshëm minimumi katër implante dentare, nga ku rrjedh edhe emri i teknikës “All on 4” ose 'Gjithçka mbi katër'. Megjithatë, sa më shumë implante të vendosen në një nofull, aq më mirë do të shpërndahen forcat gjatë përtypjes, duke rritur stabilitetin dhe jetëgjatësinë e tyre, dhe duke zvogëluar rrezikun që një implant të mbingarkohet.

Kjo metodë përfshin vendosjen e katër implanteve dentare dhe fiksimin e një proteze fikse mbi to. Zakonisht aplikohet në nofullën e poshtme, sidomos në rastet kur pacienti nuk ka mjaftueshëm kockë për të vendosur gjashtë implante. Në këto raste, dy implantet e fundit pozicionohen në një kënd të pjerrët, duke shmangur struktura anatomike të rëndësishme si nervi mandibular dhe sinusi maksilar. Teknika nuk është shumë e përshtatshme për nofullën e sipërme për shkak të brishtësisë së kockës, çka rrit rrezikun e komplikacioneve.

Në këtë teknikë, proteza fikse mbështetet mbi 6 implante, që konsiderohet standardi më i lartë në implantologji. Kur kocka është në gjendje të mirë, kirurgu përpiqet gjithmonë të vendosë të paktën gjashtë implante në një nofull, pasi ky numër ofron stabilitet të përhershëm për protezën dhe implantet.

Me këtë metodë, zëvendësohet e gjithë harkada dentare me një protezë që përmban 12 deri në 14 dhëmbë prej metal-porcelani ose zirkoni. Në rastet kur cilësia e kockës është e dobët, veçanërisht në nofullën e sipërme, kirurgu mund të rrisë numrin e implanteve duke vendosur 7 ose 8 implante për të siguruar më shumë stabilitet.

Implanti pterigoid përfshin tre struktura kockore (tuberozitetin maksilar të maksilës, procesin piramidal të kockës palatine dhe procesin pterygoid të kockës sfenoidale), të cilat gjenden në pjesën më të pasme të nofullës së sipërme. Këto kocka janë më të qëndrueshme dhe nuk i nënshtrohen resorbimit siç ndodh me kockën e nofullës, duke e bërë këtë zonë një mundësi ideale për vendosjen e një implanti dentar te pacientët që kanë humbur kockën në nofullën e sipërme.
Përveç kësaj, implantet pterigoid janë veçanërisht të qëndrueshme dhe më të gjata se implantet tradicionale, duke arritur një gjatësi prej 15 deri në 25 mm, që siguron një vendosje të saktë dhe të sigurt në kockë.

Për të arritur osseointegrimin dhe funksionimin për një kohë të gjatë, një implant kërkon stabilitet parësor dhe sekondar i cili arrihet duke përfshirë korteksin e dendur të kockës.

Implantet zigomatike janë një metodë specifike e përdorur për të trajtuar pacientët që kanë humbur një sasi të madhe të kockës. Këto implante janë më të gjata dhe vendosen në një kënd më të pjerrët në krahasim me implantet dentare tradicionale. Në vend që të vendosen në kockën e nofullës, implantet zigomatike pozicionohen në kockën e mollëzës (zigoma), e cila është shumë e fortë dhe ofron mbështetje të qëndrueshme dhe afatgjatë për implantet.