Ortodoncia

Ortodoncia interceptive është hapi i parë drejt krijimit të raporteve të sakta midis nofullave dhe rreshtimit të dhëmbëve. Ashtu si me patologjitë e tjera, parandalimi ose trajtimi i hershëm sjell rezultatet më të mira. Qëllimi i ortodoncisë interceptive është të identifikojë që në fëmijërinë e hershme problemet dento-skeletore. Kontrolli i okluzionit dhe zhvillimit të nofullave fillon rreth moshës 4-5 vjeç, kur fëmijët janë më bashkëpunues, dhe vazhdon të monitorohet deri në pubertet.

Aparatet e ortodoncisë interceptive mund të jenë brenda ose jashtë gojës, dhe ndonjëherë mund të jenë të fiksuara drejtpërdrejt mbi dhëmbë. Pajisjet fikse përdoren për të korrigjuar mospërputhjet transversale të nofullës së sipërme dhe njihen si zgjerues të shpejtë.

Nëse kjo anomali nuk korrigjohet në këtë fazë, problemi do të transferohet edhe në nofullën e poshtme, dhe kur të përfundojë rritja, zgjidhja e vetme për të arritur një raport të rregullt midis nofullave është kirurgjia ortognatike. Për këtë arsye, për të shmangur kirurgjinë dhe për të arritur rezultatet më të mira, rekomandohet një konsultë me ortodont sapo fëmija juaj të mbushë 5 vjeç.

Kur flasim për ortodoncinë fikse, i referohemi një pajisjeje që përbëhet nga një sistem pllakash (braketa), banda, tuba, tela dhe llastikë ligature. Ky aparat është zgjidhja më e përshtatshme për të korrigjuar rregullimin e dhëmbëve dhe mbetet alternativa më e mirë për trajtimin e anomalive të rënda të rreshtimit.

Pllakat vendosen në sipërfaqen e jashtme të dhëmbit, por në disa raste specifike, nëse është e mundur, mund të vendosen në sipërfaqen e brendshme, duke i bërë ato të padukshme. Telat ndërrohen çdo 2 ose 3 muaj, duke rritur gradualisht trashësinë dhe forcën e tyre. Trajtimi zgjat rreth 2 vjet, megjithatë kjo varet nga lloji i anomalive.

Sistemi fiks tradicional përdor pllaka metalike, të cilat janë e vetmja zgjidhje për rastet më të ndërlikuara. Përveç pllakave metalike, mund të përdoren edhe pllaka estetike. Idealisht, trajtimi fillon në moshën 12-14 vjeç, por ortodoncia fikse nuk ka kufizim moshe, kështu që nuk është kurrë vonë për të arritur një buzëqeshje të bukur.

Një nga shqetësimet kryesore të pacientëve që mbajnë aparate ortodontike është pikërisht pamja e pllakave metalike të vendosura në sipërfaqen e dhëmbëve, gjë që mund t'i kufizojë ata në jetën e përditshme. Për të kapërcyer këtë problem estetik, falë teknologjisë së avancuar, pllakat metalike mund të zëvendësohen me pllaka qeramike ose zafiri.

Pllakat qeramike janë në ngjyrën e dhëmbëve, ndërsa pllakat e zafirit janë transparente, duke i bërë ato pothuajse të padukshme. Megjithatë, teli që lidh çdo pllakë mbetet gjithmonë metalik, dhe në fakt është i vetmi komponent i dukshëm në këto aparate.

Maskerinat e padukshme Invisalign® përfaqësojnë gjeneratën më të re të aparateve ortodontike, të cilat mund të transformojnë përgjithmonë buzëqeshjen dhe jetën tuaj.

Pas vite të tëra kërkimesh, ortodoncia më në fund ju ofron mundësinë që të keni buzëqeshjen e ëndrrave tuaja pa u vënë re nga të tjerët.

Ky trajtim përfshin një seri maskerina plastike plotësisht transparente, të krijuara në laboratorë të çertifikuar, duke përdorur një material të posaçëm të quajtur SmartTrack. Prodhimi i maskerave realizohet në bazë të udhëzimeve të ortodontit, pasi ai të ketë studiuar rastin tuaj.

Është shumë e rëndësishme të zgjidhni një mjek të specializuar dhe të përditësuar në ortodoncinë e padukshme, sepse ata do të përcaktojnë virtualisht çdo lëvizje të dhëmbëve për të arritur rezultatin e dëshiruar.

Numri i maskerave dhe kohëzgjatja e trajtimit varen nga diagnoza fillestare dhe gjendja specifike. Maskerinat ndryshohen çdo dy javë, dhe të gjitha ju jepen në fillim të trajtimit, duke shmangur nevojën për vizita të shpeshta në klinikë, siç kërkohet me aparatet tradicionale fikse.